بالفضل مش بالأمر ..
إكتبلي آخر فصل فى القصه ..
الصحبه مش بالعمر ..
الصحبه مين باعك .. ومين لسه ..
كان فيك قيراط ميزه .. فـ غفلت أرض عيوب ..
غضيت في طرفي عشان .. كان الميزان مقلوب ..
لو لسه بيننا قلوب .. وسط الكلام ع الشات ..
سيب الكلام مكتوب .. وانسىٰ القلوب بالذات ..
لو لسه فيه سلامات .. خليها مطرحها ..
لو ع اللى جاي علامات .. من فضلك اطرحها ..
كام غلطه في البدايات .. لما اهدىٰ .. هاشرحها ..
لو ليا ضهر ومات .. فـ انا لسه ليا كتاف ..
كل اللى خاف صاحب .. بعد اما صاحب خاف ..
وانا خوفت جايز .. بس .. كان خوفي ليه معنى ..
كان نفسي برضه تخاف .. فـ الخوف يجمـّعنا ..
" ضاق الخُلُق بيا .. والصمتُ قد غـّرك "
لو ليك مكان فيا .. فـ أكيد هايتحرك ..
غرقان انا ف برك .. يا شط مليان موج ..
قولت اتقي شرك .. فـ مشيت فى نفس الفوج ..
القصه دي مونولوج .. وانت البطل فيها ..
خلّي اللي بيننا خروج .. ومشاعرك الغيها ..
غلطان ؟ هاعديها .. وشويه وهاروقلك ...
مجروح انا بتُقلي .. وجرحتني بتُقلك ..
هذا الذي كان بيّننا ولّىٰ ..
فـ اتمنى ليا الصبر والسلوان ..
ينفع نقول حالاً سلام وللا ؟
ندي اللى بيننا ١٠٠٠ فرصه كمان ؟
هذي الرساله من صميم قلبي ..
وقراها قلبي من صميمهُ اتخض ..
ازاي هعيش وانا وانت مش جنبي ..
وازاي هبدل حد زيي بـ حد ..؟
هذي الرساله نـَصها ليا ..
هذي الرساله نـُصها فيا ..
نُصي اللى كاتب نـَصها ضحيه ..
مستني نـُصهُ الجاني يبعت رد ...!!
#Abo_Ne3ma
https://www.facebook.com/100003110735562/posts/pfbid05pV7FX3jmf8vbpu3LCxANKyauKvgU82btKSPYBnP1r1RdF63G73be29gZrAM4KFZl/
